Анар Баймуратова, 36 жаста. HR маманының жұмысы және сәттіліктің маңызды компоненттері туралы

1. Өзіңіз туралы айтып берсеңіз

Менің аты-жөнім Баймуратова Анар, жасым 36-да. Менің 2 жоғары білімім бар: «Физика және информатика» және «Құқықтану». Жоғарғы оқу орнын бітіргеннен бастап жұмыс істеймін. Жалпы еңбек өтілім 14 жыл. Ал HR саласында жұмыс істегеніме 6 жыл.

2. Кім болып жұмыс істейсіз?

Мен «Даму» кәсіпкерлікті дамыту қоры» АҚ персоналды дамыту бөлімінің бас менеджерімін. Бұл компанияда 2019 жылдан бері жұмыс істеймін және рекрутинг, қызметкерлерді оқыту және таланттарды басқару мәселелеріне жетекшілік етемін.

3. Қазір істеп жатқан ісіңізге қалай келдіңіз?

2015 жылға дейін әртүрлі компанияда және HR-ға жанама қатысы бар лауазымдарда жұмыс істедім. 2015 жылы «KMF» халықаралық қаржы ұйымында HR маманы болып жұмыс істей бастадым. Мұнда мен кадрлық іс жүргізу саласында білім мен тәжірибе жинақтап, қызметкерлерді таңдау, іріктеу және бейімдеу әдістерін іс жүзінде үйрендім. Содан кейін Астана мен Алматыда орта бизнес компанияларында HR менеджер болып жұмыс істедім. 2019 жылы «Даму» жұмысқа шақырту алдым.

4. Жұмысыңыздың қандай артықшылықтар мен кемшіліктері бар?

Артықшылығы көп. Мысалы, бұл адамдармен байланысты жұмыс, қызықты кейс, жаңа техникалар, бизнес-процестерді автоматтандыру. Қазіргі уақытта көптеген компания қызметкерге қатты мән береді. Бұл, сөзсіз, жігерлендіреді, өйткені қызметкер мен жұмыс беруші арасындағы қарым-қатынас «win-win» принципіне негізделуі керек.

Мамандықтың негізгі кемшілігі пандемия кезінде болды. Пандемия әрбір қызметкердің психоэмоционалдық жағдайына әсер етті. Қызметкер ұжымның бір бөлігі және ол осындай қиын уақытта жұмыс берушінің қамқорлығына мұқтаж. Көптеген компания қазір мұны істеп жатыр: Air Astana, Tele2 және басқалары.

5. Сіздің жұмысыңыздың міндеттері қандай?

Менің міндеттерім:

- қажет болған жағдайда өз блогымды реттейтін ережелерге өзгерістер енгіземін;

- бас кеңседе және аймақтық желіде бос орындарға үміткерлермен телефон арқылы және жеке әңгімелесу жүргіземін;

- қызметкерлерді оқытуға арналған бюджетті ойластырамын және реттеймін, осы қызметтерді сатып алу бойынша жұмыстардың бір бөлігін атқарамын;

- оқуға қажеттілікті бақылаймын және қызметкерлерді оқу іс-шараларына жіберемін;

- кәсіпорынның кадрлық резервін қалыптастырамын және онымен жұмыс істеймін;

- мен басшылық пен акционерге есеп беремін.

6. Сіз өз ісіңізді жақсы көресіз бе?

Иә, әрине, жұмысым ұнайды. Болашақта осы саладағы қызметімді жалғастырамын деген жоспарым бар.

7. Сіздің салаңызда қандай дағдылар бағаланады?

Кәсібилік пен құзыреттілік, көп тапсырманы орындау, тез шешім қабылдау, жауапкершілік және жақсы қарым-қатынас дағдылары.

8. Enbek.kz оқырмандарына қандай кеңес бересіз?

Мен үміткерлерге ең алдымен өзіңізге сеніңіз дегім келеді, өйткені сенім – әрқайсымыздың қозғаушы күшіміз. Алға үлкен мақсат қойып, оларға жету үшін іс-әрекет жоспарын анықтап, жоспарлы түрде әрекет етіңіз. Мотивация мен өзіңізді ынталандыруды да ұмытпаңыз. Белсенді болып, өзгерістерден қорықпаңыз. Өзіңізге ұнайтын және сізді шабыттандыратын нәрсені табыңыз. Сондай-ақ көңіл-күйіңіз түспесін: табысты болу үшін жақсы ойлау маңызды және бұл кез келген адамның қолынан келеді.