Халықты жұмыспен қамту орталықтары жұмыс берушілермен бірлесе қызмет ете отырып, бос жұмыс орындарын іздейді және өтініш білдірген азаматтарға жұмысқа орналасуға жәрдемдеседі.

Халықты жұмыспен қамту орталықтары орналасуға жәрдемдеседі:

1) халықты жұмыспен қамту орталықтарының дерекқорында бар бос жұмыс орындарына;

2) жұмыс берушілер өздігімен «Жұмыс» интернет-порталында (www.enbek.kz) жариялаған жұмыс орындарына;

3) уақытша жұмыс орындарына: жалақысы ішінара субсидияланатын әлеуметтік жұмыс орындарына, жастар практикасын өтуге арналған жұмыс орындарына,  уақытша жұмыспен  қамтамасыз етуге арналған қоғамдық жұмыс орындарына.

Халықты жұмыспен қамту орталықтарымен үміткерлерді кәсіби іріктеу жұмыс іздеушінің (жұмыссыз адамның)  мамандығы (лауазымы), оның біліктілік деңгейі, жұмыс тәжірибесі мен дағдылары, қалаған жалақы деңгейі, жұмыс уақыты режимі ескеріле отырып, сондай-ақ жұмыс берушілер қойған басқа талаптарға сәйкес жүзеге асырылады.

ҚҰҚЫҚТЫҚ НЕГІЗ

• «Халықты жұмыспен қамту туралы» Қазақстан Республикасының Заңы
• Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған «Еңбек» мемлекеттік бағдарламасы (Қазақстан Республикасы Үкіметінің 2018 жылғы 13 қарашадағы №746 қаулысы)