Әлеуметтiк жұмыс орны

Әлеуметтiк жұмыс орны – жұмыс берушi Қазақстан Республикасының нысаналы топтардағы азаматтарын жұмысқа орналастыру үшiн жергiлiктi атқарушы органмен шарт негiзiнде құратын, жұмыс берушiнiң олардың еңбегiне ақы төлеу шығындары iшiнара өтелетiн жұмыс орны
Әлеуметтiк жұмыс орындары жұмыс берушiлерде олардың меншiк нысанына қарамастан ұйымдастырылады.

Әлеуметтiк жұмыс орны уақытша жұмыс орындарын құру арқылы ұйымдастырылады және мынадай ерекшелiктерi бар:
1) арнайы нысаналы топтарға арналған;
2) жұмыс орындарының саны шектелмеген, жұмыс уақытша сипатта болады және оны ұйымдастыру үшiн тұрақты жұмыс орындары мен бос жұмыс орындарын пайдалануға болмайды.

Азаматтардың әлеуметтiк жұмыс орындарына орналасуына жәрдемдесу
Уәкiлеттi органдар және/немесе халықты жұмыспен қамту орталықтары:
1) азаматтарға әлеуметтiк жұмыс орындарына орналасуға байланысты мәселелер бойынша консультация бередi;
2) жасалған шарттарға сәйкес халықтың нысаналы топтары қатарындағы азаматтарды ұйымдастырылған әлеуметтiк жұмыс орындарына орналасу үшiн жұмыс берушiлерге жiбередi.

Азаматтарды ұйымдастырылған әлеуметтiк жұмыс орындарына орналасу үшiн жiберу кезiнде мыналар ескерiледi:
1) жiберiлген азаматтар уәкiлеттi органда немесе халықты жұмыспен қамту орталығында «Халықты жұмыспен қамту туралы» Қазақстан Республикасының 2001 жылғы 23 қаңтардағы Заңына сәйкес жұмыссыз ретiнде тiркелген және халықтың нысаналы топтарына жатуға тиiс;
2) жолдама беру сәтiнде жiберiлетiн азаматтар үшiн уәкiлеттi органда және/немесе халықты жұмыспен қамту орталығында лайықты тұрақты жұмыс болмаған болуы керек.

Азаматтар ұйымдастырылған әлеуметтiк жұмыс орындарына он екi айлық кезеңде бiр рет қана орналаса алады және тiркелген күнiне сәйкес кезектiлiк тәртiбiмен жүзеге асырылады.
Жұмыс берушiнiң бастамасы бойынша әлеуметтiк жұмыс орнына қабылданған азамат жасалған еңбек шартының мерзiмi аяқталғанға дейiн тұрақты жұмысқа қабылдануы мүмкiн. Бұл ретте жұмыс берушi уәкiлеттi органға немесе халықты жұмыспен қамту орталығына тұрақты жұмысқа қабылдау туралы бұйрықтың көшiрмесiн жолдайды.